يوم الى وفى ومن معرض الكتاب

لو حد نال شرف زيارة معرض الكتاب السنه دى أكيد هايشاركنى الرأى والنقد
اليكم قصه بسيطة لما الواحد حب يروح معرض زنقة الكتاب ,طبعا انجاز فى القاهره انك تحصل على مواصله لا تقل من قيمتك و بالتالى اقتناء عربية هناك أصبح مثل اقتناء شقه واللى ها يتحكى دلوقت نتيجة ان العربية يومها كانت مشغولة والفقيرة الى الله اضطرت ركوب الهوا اللى ياريت كان يتركب ده حتى كله عوادم ورصاص تموت الموتى فى قبورهم المهم قررت بعد حسبة معقده وصراع مرير مع النفس انى هاركب تاكسى وبالفعل بدأت رحلة البحث عن تاكسى....
أرض المعارض ياأسطى
لا ( لا لا لا وتتكرر عدد لا بأس به من المرات هذه الجملة الى تتطرب أذن الواحد الى أن وأخيرا
أرض المعارض ياأسطى
يرد عليا بطريقة واحد بيلعن نفسه: خمسه جنيه ياأاستاذه ,,
فطبعا(مجبر أخاك لابطل) أقوله اتوكل على الله ياأسطى(وأقول لحالى الله يقرفك على الصبح شغلتك وبتتأمر على لقمة عيشك روح الله....)
المهم بعد وقت بسيط جدا جدا لا يتعدى الساعتين ومع مليون لعنة من السواق على البلد وعلى ناس اللى فى البلد اللى هو شايف نفسه مش منهم
,قال ايه السواق بيقولى: الشارع ده زحمه وهانزلك من الناحية التانية
فقلت :لا أنا كده هادب مشوار مشى , أمال أنا راكبه تاكسى ليه؟
وكأنه خلاص اتخذ القرار بتأميم القنال وأنا بقى اللى بوقف حاله وحال البلد وبداء يلعن أسلافه
فقلتله :رووووح ياااااأسطى (وفى سرى الله ينحسك)
أخيرا عدت نص ساعة على الطريق الفاضى جدا اللى قال عليه واسود وشه ونزلنى أمشى على رجلى فى الجو المهبب ده واديت له الفلوس ومش عارفه أعاتب مين؟ السواق الغلبان؟ اللى بصلى وقالى: معلش يا أستاذه والله بس الطريق التانى ما كانش فيه أمل؟ ولا أعاتب أصل الفساد اللى مش معروف له أصل؟
المهم تم بحمد الله الوصول لأرض المعارض
المدخل منين ياعالم
ألاقى كوم لحم عند مدخل مش عارفه ليه متكومين عليه؟, افتكرت انه باب الدخول والخروج الوحيد من والى الجنة قصدى معرض زنقة الكتاب وبنظرة متجولة متفحصة لقيت باب تانى مفتوح
,فسالت الحارس: الدخول من هنا؟
قالى: اتفضلى
قلت يااااااااااااااااا سلااااااااااااااااااااااام أمال الناس عاملين فى روحهم كده ليه هناك ؟ عشق الطوابير الظاهر مسيطر عليهم اوى عاملين زى حكاية الراجل اللى وقف يربط رباط الجزمة وقام جاى واحد وقف وراه وبعدين التالت والرابع وهكذا الى ما شاء الله ولما الموضوع طول بدأوا الناس يسألوا هو ده طابور أيه؟ فراحوا لأول واحد فى الطابور وسألوه انت واقف ليه؟ قالهم أنا كنت واقف أربط الجزمه لقيت الطابور ورايا فقالوا له طب وسع ياأخى وخلى الطابور يمشى قالهم الله وعايزنى أسيب دورى!!!!! قصه تنم عن تعود المواطين الغلابه على عشق الطوابير وذلك لما فيه من تنمية العلاقات الاجتماعية فالحياة طابور وجوه الطابور حياة والحياة حلوة وأجمل غنوة والخ...
وأخيرا دخلت عالم عجائب وغرائب ,,,معرض كتب على الرفوف وكائنات سارحة بتأزأز لب وتفتف يمين وشمال مع الهمس الذى هو عندهم نوع من الصراخ (انت يا ولا,وانتى يابت ,وأنا عايزه أدور فيهم الضرب كلهم) وأنا أتعمد التسمية كائنات مش ناس لأن ده مش سلوك بشرى ولا انسانى ولا حتى حيوانى دى القطط والكلاب ما تقذرش مكانها كده, لا والألعن انه على كتب العلم والثقافه والاخلاق ولا كأننا فى فسحة مع التخلف فى معرض دولى للثقافه فهم كائنات لم تحدد فصيلتهم حتى الان وهناك طبعا فئه من الناس تتعامل بكل النظام والتحضر وفى ناس جايه تتفرج على الناس اللى بتشترى كتب
,دى أول صدمة تلقيتها لما دخلت أولى صالات العرض اللى ما فلحت فى حساب عددهم حتى الان, المهم بدأت أدور على غرضى اللى جيت علشانه وركزت جهدى فى انى الاقيه باذن الله (هه استعنا على الشقى بالله بسم الله الرحمن الرحيم جهزوا أنابيب الأكسجين وبدل الغطس وتعالوا ندور على غرضى) انفصلت عن العالم الخارجى مؤقتا بحثا عن هدفى ,كنت بدور على كتب تتعلق بالدراسة مما أثار شك الكثيرين بجنونى بتعليقهم الاتى حد يشترى كتب رياضه وكمان ب( كذا) جنيه؟ (نظرة محدودة طبعا وأنا أشفق على هذه العقليات) وبالفعل ربنا سهلها واشتريت كتابين فقط مما أبغى لانى انا طماعه اوى فى الكتب دى وكان بودى المزيد ,,
,المهم مشيت فى باقى المعرض حاضنه كتبى( كنوزى الثمينه) ولسه فى حالة الانفصال عن العالم الخارجى الى انى فقت مصعوقه على منظر بشع فى معرض زنقة الكتاب اللى تحول الى مطبخ الشيف فلان علان لما وقفنى الشيف فلان علان بنفسه
وقالى: اتفضلى دوقى حضرتك
ذهلت من المنظراللى خلانى اشك فى نفسى ان رجلى اخدتى لحته تانيه فى البلد وانا مش حاسه ولا حاجه,,,, قال ايه الشيف فلان علان عامل دعايا لكتابه مطبخك جوه بطنك ولا مايتسمى مش عارفه
,وبعد الصدمه والافاقه منها قلتله :لا لا الف شكر
والناس واقفه بتثبت صحة عنوان الكتاب و لسان حالها بيقول عليا شوف الهبله اللى فوتت عمرها قال ياعنى حتة كيك هاتودى عمرى لو ما دقته ,,واليكم المنظر البديع وسط رفوف الكتب المرصوصه واقفه عربيه بيشرف عليها الشيف فلان علان لتوزيع كيك من وصفاته اللى من غيرها مش ها نعرف ناكل والناس طبعا من الفئه اللى سبق ذكرها ما تكدبش خبر وابو بلاش كتر منه
طلعت أهرب من المكان المقرف ده وبعد تجاوز الصدمة دى بدأت ارجع مره تانيه للعالم بعد الانفصال السابق وفوجئت انه عدى عليا ما يقرب من سبع ساعات غطس قصدى بدور على الكتب معلش نقص اكسجين هوا يا بشر فين الهوا هى الفاتوره ما اتدفعتش ولا ايه ؟ الواحد مكتوم بقاله سبع ساعات خلاص الدم المتأكسد فى جسمى وشك على النفاذ يرجى اعاده شحن البطاقه اييييه ده؟ انا بخرف من نقص الاكسجين هوا يا خلق بسرعه هوا أهه الباب ظهر بعد عناء واخييييرا نفدت بره البوابه
وقررت انى اطلع امشى اتوكل على الله اروح بقى
وطبعا نزول السلم مش زى طلوعه واللى حصل والواحد رايح متوقع اضعافه وهو مروح ,طبعا ولا تاكسى راضى يقف ومنها نضطر لاستخدام خطط بديله وحركات كونغ فو على حبة عجين الفلاحه علشان الواحد يركب وبدون سرد المعروف من فقش البطيخه والكلام الجميل ده انا كنت سعيده انى اشتريت الكتابين ومن السعاده ما حسيت بمعاناة المواصلات وربنا سلم الطريق من غير قلة قيمه والحمد لله ,ولما وصلت البيت حسيت بقمة الانجاز وصليت فرضى وجددت طاقتى بعدس دافى جميل لزوم التلج ورحت لكتبى وكنوزى الجميله مع كوب شاى بالنعناع الساحر وقعدت أقراء فيهم لحد امتى ما اعرفش لحد ما صحيت تانى يوم والكتب فى حضنى على صوت اختى قاعدة تضحك على منظرى وتقول انتى بتدفى بالكتب ولا ايه؟ للدرجادى العلم بيدفى ؟