"بيقولوا" دى كلمة "بتتقال" أكيد زى باقى الكلام
كلنا بنستعملها و"بنقولها" أكتر من اسمنا
و"بيقولوا" الشاطر اللى يحاول يقلل من استعمالها
عشان "بيقولوا" إنهم اكتشفوا أنها خطر على الأمن العام
"بيقولوا"!
"بيقولوا" إنه "قيل" أن كلمة "بيقولوا" ذات تأثير ساحر قوى بحت ديناميكى جدا
كلمة تعمل كفاصل رائع بين كلمات الجملة الخبرية الواحدة
لتفتح سماء من الامطار التساؤلية التعجبية الإستنكارية العجيبة جدا
جرب قف فى أى مكان حتى لو ما تعرف فيها أحد وسمى بالله وقول
"بيقولوا" على فكرة إن ........
ولك الأتى
بجججججد ! والله! عرفت منين!
طيب ونجيبه منين؟ أنا عايز أعرف!
إشمعنى !
لتتحول أنت إلى مرجع طبى هندسى رياضى دليل تيليفونات
جريدة الأخبار أى مصدر مسؤول والسلام
"بيقولوا" إن بكره أجازة
الله حاجه روعه! ياسلام هانام؟! طيب ماتعرفش السبت الجاى أجازة ولا لأ ؟!!!!!
"بيقولوا" الأكل ببلاش هناك
معقول؟ وقد ايه تاكل ! وإيه اللى خلاهم يعملوا كده؟
"بيقولوا" إن المحاضرة اتلغت
بجد؟ ربنا يفرحك ! شكرا! اصل الدكتور "قال له" طبعا !!!
إيه هو اللى طبعا؟؟؟؟!!!؟؟
ياللعجب انه مزاد غريب حقا
بس فى ناس خنقه "بيقولوا" إنهم بيحبوا الخنقه لما "يتقال " لهم "بيقولوا"
فا مش "بيقولوا" بججججججججد
إلا بعد سبب مقنع بحت
"بيقولوا" الإمتحانات يوم 18 يناير
"بيقولوا"؟
اه "بيقولوا"
طيب ما "قالوليش" ليه؟
عشان خلاص اتحددت
إيه اللى اتحددت؟
الإمتحانات
مين حدد؟
اللى "قالوا"
وهو مين اللى "قال"؟
أنا
بجججججججججججججججججد
والله
الف الف شكر
تصدق فكرتنى
ما كنتش أعرف إن الجدول متعلق وراك أهه
وحتى ببص عليه وأنت "بتقول"
عمال "تقول" بس انا شايف وحاسس
إننا بنتقصف
قصدى هانبدأ
الإمتهانات
قصدى الإمتحانات يوم 18
طبعا الناس الخنقه لما تيجى تستعمل "بيقولوا" بتخنق بردوا
بيقولوا الإمتحانات إتلغت السنه دى
#+-#$@)*=*%**
$%%#
إيرور
.....
وسعت منك أوى دى
إيه مفعول السحر وقف ولا إيه
إشمعنى دى بقى الناس ما صدقتنهاش
واضح إن الناس بتسمع "بيقولوا" على تفصيل مزاجهم
المهم انى بقى "بقول"
* مش "بيقولوا" هاه
عشان كل واحد متحمل مسؤولية كلامه
إن إمتحاناتى إن شاء الله يوم 18 يناير
و"بيقولوا" إنى إختفيت
بس أنا "بقول" إنى بذاكر
والشتاء دخل معلنا بدء خروجى من البيات الفكرى
وإستعادة ذكرياتى الشتوية
لعلى سوف أحدثكم عنها لاحقا
وحتى أحدثكم عنها
أدعو الله أن يوفقنا جميعا
ونواصل نجاح بإذن الله
وأن يجعلنا من عبادة المقربين الصالحين
ويجعلنا سببا فى صلاح أمتـنا
وكل إمتحانات وأنتم موفقون كل عام هجري وأنتم بخير
وتكون سنة تهاجرون فيها إلى النجاح والتقدم والإصلاح وأنتم إلى الله أقرب
4 comments:
طيب أنا مش حرد عليكِ غير بعد الإصلاحات اللغوية والهمزية بقى
عشان بيقولوا إن في ناس كثير تعبت على ما توصل لنا قواعد اللغة العربية
بيقولوا تحياتي
كلامك صح عزيزتى
وأنا أقول إنى أحاول الإصلاح
دمتِ بخير عزيزتى منورانى
hehehehehehe 3andek 7a2 Ms marble lo el nas tebatl te2ol we tatwakal 3ala ba3d ... we 3amalo 7agah makansh da ba2a 7alna ... nebatal ne2ol we NESHTA3'AL begad .. howa eli bey y7sal fi 3'azah geh men shoaih .. maho bardo men el nas eli "BE2OLO" ... heh2
نور الهدى:
حياكِ الله عزيزتى
فعلا إنه الوقت لنعمل سعيا نحو إصلاح ذاتنا ومن حولنا
أنرتِ المدونة
Post a Comment